Samanburður á Suunto úrum

Það getur verið erfitt að sjá muninn á heilsuúrum og hvað hentar hverjum. Hér að neðan er tafla sem sýnir helsta muninn milli módela en við reynum að útskýra muninn hér líka. Öll úrin eru jafn vönduð og góð, virknin er í grunninn nánast sú sama milli allra úra, en mismunandi eiginleikar geta hentað mismunandi aðilum. Hér má sjá algjöran samanburð á heimasíðu Suunto.

Suunto Race 2 / Race / Race S:
Þetta eru úr sem við teljum henta flestum, bæði þeim sem eru að leita að æfingaúri en líka snjallúri almennt – sérstaklega þar sem það kemur í tveimur stærðum. Gullfallegur og bjartur AMOLED skjár og góð rafhlöðuending. Race henta sérstaklega vel þeim sem eru virk í skokki, styttri og lengri hlaupum, hjólreiðum og allri hreyfingu sem tekur mið af hraða og vegalengd. Suunto Race geta mælt mjólkursýruþröskuldinn. Race S eru 50m vatnsvarin, svo það má synda með þau og stunda léttari vatnasport. Race og Race 2 eru 100m vatnsþétt, svo þau þola sund, yfirborðsköfun (snorkl) og brimbrettabrun.

Run:
Run er gríðarlega létt, aðeins 36g, og einfaldari og hagkvæmari en önnur úr frá Suunto. Þau eru frábær fyrir öll sem eru að taka sín fyrstu skref í hreyfingu eða vita nákvæmlega hvað þau þurfa. Þessi bjóða ekki jafn margar íþróttir en henta frábærlega fyrir allar íþróttir þar sem þú ert að mæla hraða og vegalengdir, s.s. hlaup, göngur og hjólreiðar. Þú hefur leiðsögn (breadcrumb) en ekki ítarleg kort eins og í Race og Vertical. Run geta mælt mjólkursýruþröskuldinn. Run eru 50m vatnsvarin, svo það má synda með þau og stunda léttari vatnasport. Aðrir eiginleikar, eins og svefn- og hjartsláttarmælingar og GPS-nákvæmni er á pari við öll önnur Suunto.

Vertical 2:
Vertical er hugsað í fjallamennskuna, fyrir þau sem eru í lengri túrum og almennri ævintýramennsku. Rafhlaðan er með ótrúlega endingu, skjárinn er samt bjartur og skarpur, og úrið er með LED-vasaljósi. Það má hugsa þetta þannig að Run og Race séu hugsuð fyrir malbik og Vertical fyrir náttúruna. Race 2 og Vertical 2 eru sambærileg úr, en Vertical hefur vinninginn í raflhöðuendingu og vasaljósinu.